भोजाहा नेउटा || Bhojha Newta

भोजाहा नेउटा || Bhojha Newta

 चारुओर भोजाहा नेउटा बट्ना सुरु हुइल रहठ । डिन ठेगान जम्मा मिलाइल रहठ । करुणा के भोजक हुकार घरेम चहलपहल मचल रठिन । करिब एक हप्टा रहगिल रहिन परछना डिन । अचानक डुलहि बेपट्टा हुइल खबर आइट । एकओर भोज लच्क्याइल टे एकओर करुणा बेपट्टा । आखिर काहे टे करुणा बेपट्टा होगिलिन ? गहिंरसे पटालगाइबेर डुल्हा मन नैपरल हुन । 

डुलहि बेपट्टा हुइलक ओरसे सबजहनके खोजाहि मचगैलिन । एकओर भोज पचपचहिंक अइटि रहिन टे एकओर डुलहि नाहि । घरक मनैनके सब जहनके खोजाहि परगिलिन । सबजे लौन्डिक पर रिसाइल रहिट । आप इ हमार बडनाम कराइ छोरल कहिके । एक ओर डर फेन रहिन मरगिल कि कना । करुणा अपन भोज रोक्ना बहुट प्रयास कर्लिन मने नैसेक्के घर छोरके भागे पर्लिन । उ अपन जिन्गि अप्नेहे बनैना चाह कैले रठिन । अपन रोजल जिन्गिक जोरियासे जिन्गि बिटैना योजना बनासेकल रहिन । भोज कना का हो पटा होगैल रहिन । भोज कना एकचो कर्जिना चिज हो जुत्ता चप्पल सांटेहस नै । उ अपन जिन्गिक जोरिया कुमारहें रोजसेकल रहिन । डुनुजे एकडोसरहे अपन जिवन सोंप सेकल रहिंट । मने सबकुछ जानके फने करुणाहे अलग करैना काम करटहिंन । 

कुमार ओ करुणा एक डोसरहें बहुट मैयाँ कर्ठैं । डुनुजे बिछोड नैहुइना बाचा कर्ले रठैं । उहे ओर्से डुनुजे घर छोरके भागजिठां । ओइने जसिक फेन करुणाहे अलग करैना योजना बनासेकल रहिंठ । उमेरके छोट कानुन अनसार भोज नै करैना रठिन मने करुणाके भोज औरेजहनसे करडेना चहठैं । कुमार ओ करुणा एक डोसरहें बहुट मैयाँ कर्ठैं । ओइने अपन भविश्यके डगर बनाके भोज कैना योजना बनैले रठैं । मने बाध्यटासे भागके भोज करे पर्ना डुनुजहनके अबस्था रठिन ।

कठैं भोज कना एक डोसरके इच्छ्यासे करजिना चिज हो । नैटे उ परिवार बने नैसेकट । कुमार ओ करुणा एक डोसरके होसेकल रठैं । मने डुनु घर परिवारके कुमार ओ करुणाके सम्बन्धसे सन्टुस्ट नैरहिंठ । कारण डुनु परिवारके मेलमिलाप नैरठिन । मने कुमार ओ करुणा एक डोसरहें ज्यानसे ज्याडा मैया कर्ठैं ।करुणाके परिवार करुणाहे सुफ्लाके कुमारसे अलग करैना जुक्ति लगाके मन बडल्ना सफल होजिठां । उ कुमारसे डुर हुइना प्रयास करे लग्ठिन । उ अपन कुमारहें छोरके डाइ बाबाके घर पहुनि खाइ गैल रहिन । करुणाके मैया प्रटि कौनो सक नैरठिन कुमार हे । करुणा अपन डाइ बाबाके घर एक दिन दुई दिन हप्टा दुई हप्टा होजिठिन । उहाँसे कुमारके ठन अइना चाल नैकरे लग्ठिन । 

एक डिन कुमार फोन सम्पर्क करलै करुणा आपसे फोन ना करहो कैके फोन कटडेलिन ।कुमार सब बाट समझ गिलै । उ अप्ने आपहें धोखा पाइल महसुस कर्ठैं । करुणा प्रटि मायामे धोखा पाइल समझके कुमार पागलहंस कवाइ लग्ठैं । हुकार सम्पर्क बिहिन हुइल बेला कुमार इह कहैं वाह करुणा वाह क्या मैयाके नाटक कर्लो अपन छलि ओठसे क्या बाचा कर्लो । बहुट सजिलो बा ना मायाके सम्बन्ध टुर्ना । एक्के पलमे सारा कुछ बडलडेना । कत्रा सजिलोसे महि छोरके जैना बाहाना बनैलो ।

पाँच बर्ष पाछे कुमार करुणाहे बच्चा लेहेल डेख्लैं । करुणाके संगे करिब चार बर्षके लर्का टुकुर–टुकुर नेङ्ठिन । उ बजार खेले गैल रहिन । अचानक हुकार कुमारसे भेंट हुइपुग्लिन । हुकार आँस गिरे पुग्ठिन । कुमार जन्ना खोजल रहिंट काजे करुणा अइसिके कर्लिन । अत्रा भारि धोखा काहे कैक सबकुछ जानकलाग कुमार करुणाके सामु जैठैं । कुमार करुणाहें डोसि डेखैटि कठैं । बढाइ बा करुणा बढाइ बा । टुँहार परिवारके ओ टुँहार जिवनके सुन्डसर फलटाके । करुणा कुछ कहे नैसेक्टहिन  । आँखिमसे भलभल-भलभल आँस गिरटहिन । कारन करुणाके संग रहल लर्का औरेजनके नाइ कुमारके रठिन । हुकिन सबकुछ पटा रठिन । उ कुमारके बाटसे रोइटि ओ डुखि हुइटि कठिन । कुमार महि गलट नासोंचो इ लर्का औरेजहनके नाइ टुँहारै हो हाँ कुमार इ लर्का टुँहारे हो । हाँ कुमार मै टुँहार बाबाके धम्किसे टुँहार सामु जाइ नैसेक्नु । ओ टुँहिनसे सम्पर्क बिहिन होके रना चहनु । आज सम मै अकेलि बटु. । मै कोकरो नै हुइल हुँ । अभिन सम टुँहारे आसमे बटुँ । महि गलट ना सोचो बिन्टिबा । 

जबसे टुहिनसे अलग हुइनु उहे बेला मै निर्णय कर्लेनु कि आपसे मै किहुँसे भोज नैकरम केबल कुमारके हुँ कुमारके रहम कैक अकेलि रना प्रयास कर्टि गैनु । इह लर्कक् अनुहार हेर्के बैठम कहिके । हाँ कुमार हाँ उ बेला मै सोंचनु मोर जिन्गिक साहारा केबल कुमार हुइटैं । केबल कुमारके मैयामे रहम उ जहाँ रलेसे फेन हुँकारे यादमे आशामे जिन्गि बिटैम । एक एक पल गुजरटि जिन्गि बिटैना कोसिस करम कैक । हाँ कुमार हाँ कैक उ कठिन । उ कुमारसे माफ मंग्ठिन कुमार महिन माफ करो । मोर हर गल्टिक महि माफ करो कैक उ कुमारके उकुवारमे चपटजैठिन । अप्ने आपहें कुमारके जिन्गिम सोंपडेठिन । ओराइल।

संगम चौधरी....✍️