औली || Auli

 परिचय

औली/ औल्याही कलक खेत्वामे अनाज कातके सेकलक हे कहजाइट । औली अनाज काटके सेक्लक मौकम नाच गान कैके खुशियाली मनैना करजाइट । जे दुख कष्ट सहके रोरोके बोइट उ हाँस हाँसके काटट् कहेहस इ औलि हो । 

हिला पानी खाके सबसे कर्रा खेटि कलक बर्खा खेटि हे मान जाइट । इ धान खेटि कलक बरस भर खाइ पुग्ना मेरिक रहट । हिला किचा पानी मे करजैना इ काम एकठो अाशा लेके करजाइट कि मै कुछ बेचम लार्का पर्कन पर्हैम ओ परिवार पालम । मनै चाहे ज्या काम करले से फेन पेटक लाग भात रोटि चाहट तर किसान हे खेटि करक लाग ओ परवार पालक लाग रुप्या चहट । 

जब लगाइल धान पना पुनु पारके सेक्बो टे खेट्वमसे घरेम भित्रैन से पहिले मुठ नन्ना चहलन बा । घर गोसिया मुठ धानक मुठ लेके आइट टे गिसिन्या छाँकि ढर्काके धानक मुठ्ठा ढुरखम्बम बाँढडेठैं इ धान बर्सो सम उहे खुँटम बाँढल पलिरहट असिक कर्ले से घरेम अनाजके कबु कमि नै हुइट कना किसाननके बिश्वास रहल पाजाइट । 

मुठ लेलक रोजसे धान कटाइ सुरुहुइट । औलि कार्यक्रम ढेर मनै कटुइया रलसे मजा ओ रमाइलो हुइट । इ कार्यक्रम ढेरजसिन बेगारि लेहल मे केरल डेखजाइट । बेगारि मे गाउँक मनै ओ नाँट पाँट धान कट्बाइ आइल रठैं धाम काटे बेर गित गैना खल्वार कर्ना रमैना ओ काम करट डेखजाइट । मिठ मिठ खेना पिना टिना टावन ढेेर मेरिक रहट । संगे जाँरक दारुक छाँकि फेन चलैठैं । इ बेगारि खेट्वा सेक्ना कहिके लेना कर्ठैं ओ औली करैना सक्कु सामा जुटाके इ करल डेखजाइट । औलि हुइलक रोज सेक्ना मेरिक मनै जिता मराल फेन डेखजाइट । इ औलि कना एकठो तिह्वार जस्टे रहट । औलि कार्यक्रम सुक्कु धान काटके सेक्के उत्तर पुरुवक कोन्वामे ठोरचे धान बचाजाइट उहे धानक बिच्चेम झंगलिमे फुलामाल घलाइल रहट । उहे बिच्चेम सक्कु जहनके हँसिया ढरल रहट ।

ओ हँसिया हुल्लक ढुंङ्गा रहट कसिके उबचल धान डेब्रि हाँठेले काटजाइट ओ लरुवा फेन । उहे करम मे घरगोसिया उ हँसिया ओ ढुंङ्गा उठाके नुकाइ डौरट अस्टके औरेजे ओकर टंङ्गरि पकरके उ बचल धनक गिनोरे घिस्याइठैं ओ काटल धानेले टोपडेठैं हँस्ठैं रमैठैं छाँकि ढर्काके उहे छाँकि सबजे छँक्कैटि नाच्टि गैटि खेट्वमसे घर पुग्ठैं घरे आके जखिया खिन्या हे ढेहुरार सम छोरके नाचगान कैके खान पिन कैके औल्याहि कर्यक्रम समापन होजाइट ।

संगम चौधरी....✍️