छुट्कि थरुवा

 " उ टर्नि उहिहे पकर्लिन ओ गलचुम्मा लेलिन, ओ निर्लज्ज अनुहराले कलिन महि आज घरेम लवाँगि कर्ना बा । मै बाचा करलेटुँ ओहेमारे मै अाज टुहिन भेंट करे आइलटुँ । कहाँ कहाँ  खोजनु टुहिन अाज बल्ले भेटैनु । "


छुट्कि थरुवा


मै कोन्टि सजैले टुँ कटिया मे गड्डा बिछाइल बा । बास अइना टेल चारुओर छिटल बा । चोलो मोर घर आझ भिन्सार सम मोर संग सुटहो माया करहो । थरु घरे नै हुइटिन उ टे बिडेस गैगिल आप उ धेर डिन पाछे अइहिन रुपया कमाके । टुँ मै यहाँ मोज करब । 


बंगलाहान टर्नि बरे चम्काहा, छलमल्काहा, बोल्नाहा फेन ओ बरे बाटक सिपार रठिन । लैहर टे खै कसिन रहिन कसिन मने ससरार भर अस्टे रहिन । भोज हुइलक बरस बिटे नै पाइल रहिन घरेम भोङ्ग पारडेलिन । टेलारे मिठे खैलक बानि भारि जहानमे आके मनपर्डि खाइ लगाइ ओ घुमे नै पाके साँसे उट्मुटाइ हस लागट रहल हुहिन । 


पुर्खनके मुहेमसे सुनजाए काम प्यारा कि चाम प्यारा, कामक डरगर कि छालक डरगर । हर सास ससरुवा जंग्रार ओ कामक छरगर पटोहिया खोजठैं, मने उ टर्नि मुहक बरे डरगर रहिन । कठैं घर फोरुइया ओ बनुइया जन्नि हुइटैं । असहे के बंगलाहान टर्नि फेन घेरम भोंगा परडेलिन ओ ठरुवा हे परडेश खडेर्लिन । 


छुट्कि थरुवा

बाट टे यहाँसे सुरु हुइट जब ठरुवा परडेश लग्लिन इहाँ अपन अस्लि रुप डेखाइ लग्लिन । घरेम डारु चुहाइ लग्लिन ओ थारुनके बगाल उहाँ खालि नैहुइना । कुछ डिन उ टर्नि गाउँमे रहिन मने उहाँ रहे नै सेक्के बजारे ओर बैठे लग्लिन बजारेम फेन लागल बानि नै छेरे सेक्लिन । बरे नाउ चलल् रहिन बंगलाहान टर्नि । 


थारु नै अइलक् पाँच बरस पुगसेकल रहिन । जबे हो टबे थरुवा से झगरे खेलिन रुपया ढेर कमाके आईश घरे किहिके । एहोर टर्नि ओरे ठरुन संग पर्चल रहिन, मनैनठन बटाइन मोर छुट्कि थरुवा बा कहिके । डेख्ना मे फेन सुग्घुर रहिन एक लर्कक् डाइ होके फेन लर्का नै पाइल हस डेखाइन । पर्छवल मनै हुँकार पछे परके एजारौं रुप्या उराडिन खेना पिनामे मोज कर्ना उ टर्किन बनी रहिन । 


टमान जहनके घर बगार सेकल रहिन । अभिन फेन उ टर्निक पाछे परुया कमनै रहिट् हर कोइ फेलखाजाए उ टर्नि हुइन कि  लौन्डि कहिके । एक रोज सिदासादा लौन्डन मध्ये एक जहनहे देख्नु जे समझहीन रहे । उ लौन्डा टर्नि बैठ्ना  गल्ली ओर सोझरल रहे अपन परगा उहे टर्बि रना घरेओर सार टहे ।  साँझके, जब कि दिन डुबेलागल रहे रात अँधार हुइटहे टबे उ टर्नि अपन घरक डुह्रिम से झक्याके हेर्लिन ओ निकरके अइलिन । एक ओर से उ लौन्डा एक ओरसे टर्नि डुनुजे भेट कर्ठैं । अकेलि उ टर्नि अइलिन उहे मेरिक पहिरन जोन राटके किल घाल्ना सोहाइट । 


उ टर्नि उहिहे पकर्लिन ओ गलचुम्मा लेलिन, ओ निर्लज्ज अनुहराले कलिन महि आज घरेम लवाँगि कर्ना बा । मै बाचा करलेटुँ ओहेमारे मै अाज टुहिन भेंट करे आइलटुँ । कहाँ कहाँ  खोजनु टुहिन अाज बल्ले भेटैनु । उ टर्नि फकाके-फुस्लाके उ उहिहे रनभुल्ल परलिन, मोहित बाट करके उ टर्नि उहिहे फँशैली उहिहे छोट्कि थरुवा कहिन । तुरुन्ते उ लौन्डा टर्निक  पछे लागल, उ पटा नैपाइटहे मै कहाँ जाइटुँ वधशालाओर  लागल गोरु हस, फाँडा ओर डौरल हर्ना सह, जालओर मचके  उरके गैल चिरैया हस, अपन ज्यान गुमैम कना उहि ज्ञानै नैरहल । 


ओहोर टर्निक गोस्या जन्निक चालिबानि जानके बिडेश से अइना चालनै करटहिन ओ रुप्या पठैना फेन छोरडेलिन । आप उ टर्नि कौनो ठरुक नैरहिन । छुट्कि थरुवा कहुइया फेन नैरहिन काहेकि उ टर्निक् ढिरे ढिरे सब ओर परचार होगैलिन आपटे छुट्कि थरुवा बनिया फेन कोइनै हुइन ।

ओराइल ।

"इ कथा काल्पनिक रहे , केकरो जिन्गिम मिलिकलेसे केवल संयोग सम्झबि ।"

एक टिप्पणी भेजें

0 टिप्पणियाँ

Close Menu